យូរៗទៅជីវិតហាក់គ្មានន័យសោះ!! ចុះតើអ្នកមានរក្សាទម្លាប់មិនល្អទាំងនេះដែរឬអត់?

0
360

នៅក្នុងជីវិតរស់នៅរបស់យើងម្នាក់ៗរមែងមានទម្លាប់មិនល្អមួយចំនួន ដែលធ្វើអោយយើងក្លាយជាមនុស្សម្នាក់កាន់តែឥតប្រយោជន៍ (និយាយត្រង់បន្តិចហើយណា៎!)។ ​ប៉ុន្តែវាមិនជាបញ្ហានោះទេ ប្រសិនបើពួកយើងដឹងខ្លួននិងកែប្រែទាន់ពេលនោះ។

  • មិនចេះគ្រប់គ្រងរបៀបរស់នៅ

មនុស្សជាច្រើនមានការពិបាកនឹងគ្រប់គ្រងទម្លាប់នៃការញ៉ាំរបស់ពួកគេណាស់។ ប៉ុន្តែស្របគ្នានោះដែរ ពួកគេតែងតែប្រកែកដាច់ខាតមិនព្រមហាត់ប្រាណសោះ។ ប្រសិនបើអ្នកនៅតែរក្សាទម្លាប់មួយនេះ ប្រៀបដូចជាអ្នកកំពុងតែបន្តោយសុខភាពរបស់ខ្លួនអន់ថយទៅតាមហ្នឹងផងដែរ។

  • អត់ចេះនិយាយប្រកែកចំពោះរឿងកំប៉ិកកំប៉ុក

អ្នកនៅមិនទាន់ចេះបែងចែករឿងណាដែលសំខាន់ ឬមួយណាគួរធ្វើមុននិងក្រោយនោះទេ។ ចំនុចមួយទៀត អ្នកក៏មិនទាន់ចេះនិយាយប្រកែកចំពោះអ្វីដែលអ្នកដទៃស្នើរអោយជួយធ្វើផងដែរ។ ប្រសិនបើអ្នកនៅតែរក្សាទម្លាប់មួយនេះនឹងធ្វើអោយអ្នកបាត់បង់ឱកាសសម្រាប់ធ្វើការងារសំខាន់ផ្សេងៗផ្ទាល់ខ្លួន និងមិនអាចបញ្ចប់ទាន់ពេលផងដែរ។

  • មិនចូលចិត្តគិតច្រើន

អ្នកជាមនុស្សម្នាក់ដែលចូលចិត្តរក្សាទម្លាប់ និងធ្វើអ្វីដដែលៗ។ ដោយមិនចង់អោយខ្លួនឯងត្រូវមកអង្គុយនឹកសួរ ឬគិតរកអ្វីថ្មីផ្សេងមកធ្វើឡើយ។

  • មិនគិតគូរពីអនាគត

អ្វីដែលអ្នកសម្លឹងមើលពេលនេះ គឺត្រឹមតែបច្ចុប្បន្នភាពប៉ុណ្ណោះ។ ដោយអ្នកមិនចង់គិតពីជីវិតនាពេលអនាគត ឬបោះទុនសម្រាប់ជីវិតខ្លួនឯងនាថ្ងៃអនាគតឡើយ។

  • នៅបញ្ឈរភ្នែកដល់យប់ៗជ្រៅ

ដូចដែលអ្នកធ្លាប់ដឹងរួចមកហើយ ការដែលនៅដល់យប់ៗជ្រៅមិនមានអត្ថប្រយោជន៍សម្រាប់សុខភាព​ ហើយកាន់តែមានគ្រោះថ្នាក់ដល់សុខភាពទៀត។ មិនថាទាំងរាងកាយ និងផ្លូវចិត្តនោះទេ សុទ្ធតែមានផលប៉ះពាល់ទាំងអស់។

  • នៅតែក្នុងរង្វង់បន្ទាត់របស់ខ្លួន

មិនមានអ្វីអាចជំរុញចិត្តអ្នកអោយសាកល្បងអ្វីថ្មីឡើយ។ អ្នកពេញចិត្តនូវដែលខ្លួនមាន និងមិនចង់អោយខ្លួនឯងធ្វើអ្វីផ្សេងលើសពីនេះឡើយ។ ពីព្រោះអ្នកខ្លាចនឹងទទួលអារម្មណ៍នឿយហត់ និងភាពបរាជ័យ។

  • សម្លឹងខ្ពស់ តែមិនព្រមបន្ទាបខ្លួន

មួយថ្ងៃៗអ្នកគិតតែពីស្រមៃថាថ្ងៃណាមួយអ្វីដែលខ្លួនប្រាថ្នានឹងក្លាយជាការពិត។ ហើយបើនិយាយពីប៉ងវិញ១០០រឿងមិនទាន់គ្រប់ផង។ ប៉ុន្តែអ្នកមិនដែលដាក់ចិត្តដាក់កាយធ្វើអ្វីមួយអោយចេញផ្លែផ្កាឡើយ។

  • ផ្តោតលើតែអ្វីដែលធ្វើតែមួយភ្លែតបានផល

អ្នកចូលចិត្តធ្វើអ្វីដែលអាចទទួលបានលទ្ធផលភ្លាមៗ និងមិនចង់ចំណាយពេលធ្វើលើអ្វីដែលចំណាយពេលយូរទើបទទួលលទ្ធផលនោះទេ។ ដូចជា៖ ការសិក្សា ឬការហាត់ប្រាណជាដើម។ល។

  • ប្រើជីវិតដោយមិនមានការគិត

ក្រៅពីទៅធ្វើការ និងចេញក្រៅនោះ បើអាចអ្នកនឹងចំណាយពេលគេងលេង និងមិនធ្វើអ្វីទាំងអស់កំឡុងពេលទំនេរ។ ព្រោះអ្នកមិនចង់អោយខ្លួន​ឯងធ្វើអ្វីច្រើនជាងនេះឡើយ។

  • ចូលចិត្តពន្យារពេល

“ចាំបន្តិចសិន, ចាំស្អែកចាំខ្ញុំធ្វើ, មិនបាច់ប្រញាប់ធ្វើនោះទេ” ដែលបានក្លាយជាឃ្លាដ៏ពេញនិយមមួយរបស់មនុស្សជាច្រើន។ ចុះតើអ្នកចូលចិត្តប្រើឃ្លានេះដែរមែនទេ?

វាចា​ ដឹងថាវាមិនមានភាពងាយស្រួលក្នុងការកែប្រែទម្លាប់អាក្រក់ទាំងអស់នេះភ្លាមៗក្នុងពេលតែមួយនោះទេ។ អ្នកអាចផ្លាស់ប្តូរម្តងបន្តិចៗ និងកែប្រែយឺតៗជារៀងរាល់សប្តាហ៍។ ចុងក្រោយអ្នកនឹងមើលឃើញពីភាពផ្លាស់ប្តូររបស់ខ្លួនឯងជាមិនខាន។

ប្រែសម្រួល: Viiolette

LEAVE A REPLY

Please enter your comment!
Please enter your name here